Полицей қаржылық пирамидаға салған ақшасын қайтарамын деп сотталып кетті

Ақтөбелік полицей қаржылық пирамидаға ақша салып, оны қайтаруға тырысқаны үшін 7 жылға сотталды.

Диапазон басылымының хабарлауынша, №3 полицияның жедел бөлімінің қызметкері екі досымен бірге қала тұрғынын жанармай құю бекетіне, кейін саяжайға алдап апарған. Олар оны бірнеше күн бойы сонда ұстап, ақша мен «Ауди» маркалы көлігін беруді талап еткен. Ер адам бопсалаушылардың бірінің әкесінің атына көлікті жазып беріп, 9 млн теңге ақшаны бергеннен кейін босатылған.

Сотта полицей осылайша ақшасын қайтарып алмақ болғанын айтты. Оның айтуынша, ол «Пайдалы несие» («Выгодный займ») қаржы пирамидасына 1 млн теңгеден астам қаржы салып, басқа біреудің атына депозит ашқан. ЖШС банкротқа ұшыраған кезде полицей ұйымдастырушыны тауып, ақшасын қайтарып алуды жөн көрген. Ол өз әрекетін бопсалау емес, өз бетімен әділдік орнату деп бағалады.

Оның айтуынша, моральдық тұрғыдан жәбірленушіге қысым көрсетпеген және қорқытпаған. Бірақ, соттың мәліметінше, ол да, оның екі сыбайласы да қаржы пирамидалары бойынша жәбірленуші болмаған, олардың атында «Пайдалы несие» ЖШС-де есепшот болмаған.

Нәтижесінде экс-полиция қызметкері бопсалау үшін 7 жылға, оның екі сыбайласы сәйкесінше 6 және 5 жылға бас бостандығынан айырылды. Оларға  заңсыз бас бостандығынан айыру бойынша айып тағылды, бірақ жәбірленуші оларды кешіріп, іс тоқтатылды.

Кейін жәбірленуші «Пайдалы несие» және «Гарант 24 Ломбард» қаржылық пирамидалары бойынша айыпталушыға айналды. Іске барлығы 48 адам қатысты.