"Құпия келісім". Британ сотының Өтемұратовтың активтерін бұғаттау туралы шешімі күшін жойды

Ұлыбритания сотының қазақ олигархы Болат Өтемұратовтың активтерін бұғаттау туралы шешімі күшін жойды. Оған Өтемұратов пен БТА банк өкілдері арасындағы келіссөздер нәтижесінде қол қойылған "құпия келісім" себеп болған. Бұл жөнінде "Верный Капитал"компаниялар тобына сілтеме жасаған Өтемұратовқа тиесілі Informburo.kz сайты хабарлады.

Сайттың жазуынша, қос тарап арасындағы "құпия келісім" нәтижесінде ағылшын сотының Болат Өтемұратовтың активтерін бұғаттау туралы бұйрығы күшін жойған.

Ұлыбритания сотының Қазақстандағы ең бай адамдардың бірі Болат Өтемұратовтың активтерін бұғаттау туралы шешіміне БТА банктің арызы себеп болған еді. Wall Street Journal (WSJ) басылымының мәліметінше, "БТА банк" Өтемұратовты "банктен ұрланған ақшаны жасыруға көмектесті" деп айыптаған.

"Forbes – Қазақстан" журналының мәліметінше, Болат Өтемұратов Қазақстандағы ең бай адамдардың қатарында төртінші орында тұр. Журналдың жазуынша, оның байлығының көлемі – 2,8 миллиард доллар. Оған активтерінің көлемі бойынша Қазақстандағы ең ірі үштікке кіретін ForteBank-тің 87,27% тиесілі. Бұған қоса, Нұр-Сұлтандағы, Венадағы және Мәскеудегі «Ritz-Carlton» қонақ үйлері мен Ақмола облысындағы «Rixos Borovoe» қонақ үйі толықтай Өтемұратовқа тиесілі. Сонымен қатар оның тау-кен, мұнай-газ және телекоммуникация салаларында да активтері бар.