Петропавлдық такси жүргізушілері жеті күн аза тұтады

Петропавлда такси жүргізушілері қаза тапқан әріптесін еске алып, қайғырып, 14 маусымнан бастап жеті күн аза тұтатындарын жариялады, деп хабарлайды Orda.kz.

«Қатыгез әрі мағынасыз кісі өлтіруге байланысты қаланың барлық жүргізушілері марқұмның туыстары мен жақындарына қайғыра көңіл айтамыз. Автокөліктеріміздің айнасына немесе антеннасына қара таспа байладық. Қоштасу күнінде барлық әріптестеріміз апаттық шамдарын қосып, жұмысқа шығамыз» деп жазылған жүргізушілердің хабарламасында. 

Сондай-ақ олар такси агрегаторларына қосымшалардағы оқыс оқиға кезінде қосуға болатын дабыл түймесін қайтару туралы өтініш білдірді.

«Жүргізушілердің өмірі – құрғақ статистика емес. Күн сайын жолға шығатындардың қауіпсіздігіне көз жұмбауды сұраймыз».

Оқиға өткен жексенбіде Петропавлда болған. Жолаушымен болған жанжалдан кейін 60 жастағы такси жүргізушісі қайтыс болды. Осы уақыт бойы дәрігерлер оның өмірі үшін күрескенімен, аман алып қала алмады.

@social_media_kz ресурсының мәліметінше, жүргізуші жолаушыларды Подгора ауданынан алып шыққан. Ер адамдар мас болған болуы мүмкін. Жанжал салон ішінде олардың біреуі темекі шеккеннен басталған.

«Жүргізуші ескерту жасап, жолаушының темекісін тартып алған. Бірақ жолаушы тағы бір темекі шығарған. Сол жерде сөзге келіп қалған секілді. Олар межелі жерге жеткенде, жанжал төбелеске ұласқан. Жолаушы жүргізушіні ұрып жіберген. Ақсақал басымен асфальтқа құлаған», – дейді таксишілер. 

Полиция күдіктінің ұсталғанын растады.

«Петропавл қаласында полиция қызметкерлері 60 жастағы такси жүргізушісіне ауыр дене жарақатын келтірді деген күдікпен азаматты ұстады. Жүргізуші алған жарақатынан қайтыс болды. Қылмыстың барлық мән-жайын және себептерін объективті анықтауға бағытталған тергеу амалдары жүргізілуде»,  деп хабарлады СҚО ПД баспасөз қызметі. 

Қазіргі уақытта басқа мәліметтер жарияланған жоқ.