Петропавлды Қызылжарға ауыстыру: әкімдік пікір білдірді

Желіде Қазақстанның екі солтүстік қаласының атын өзгерту туралы онлайн петиция жарияланды.

Петиция авторы Петропавл қаласын Қызылжар, ал Павлодар қаласын Ертіс деп өзгертуге ұсыныс жасаған. Петицияға 38 мыңнан астам қол жиналды, оның 25 мыңы мұндай бастаманы қолдаса, 13 мыңы қарсы шыққан.

Петицияға Петропавл қаласының әкімі Болат Жұмабеков те жауап берді. Ол бұл петицияны жеке тұлға мемлекеттік емес сайтта жасағанын айтты. Бұл бастамаға мемлекеттік органдардың еш қатысы жоқ.

«Атын өзгерту мәселесі қала әкімдігінің күн тәртібінде тұрмағанын ресми түрде айтқым келеді. Бұл мәселе туындаған күннің өзінде оны қарау еліміздің ономастика саласындағы қолданыстағы заңнамасына сәйкес, қаламызда тұратын тұрғындардың пікірін ескере отырып жүзеге асады» деп жазды әкім Facebook парақшасында.

Сондай-ақ, ол азаматтарды бір-бірін сыйлауға шақырып, әлеуметтік желіде пікір білдіру кезінде жауапкершілікті еске салды.

«Қасым-Жомарт Тоқаев халыққа жолдауында: «Жаңа Қазақстанда біз «көзқарасы әртүрлі, ұлты бір» деген қағиданы үнемі ұстануымыз керек. Қала тұрғындарының президентімізбен ынтымақтастығына және біз әрқашан бір-бірімізбен қарым-қатынаста диалог пен ымыраға келудің жоғары мәдениетін көрсететініне сенімдімін» деп түйіндеді сөзін Болат Жұмабеков.

Еске салсақ, бұған дейін қазақстандықтар Алматының атын Алма-Ата, ел астанасын Астана деп өзгерту туралы петициялар құрған болатын.