Петропавлдағы сепаратистер екі айға қамауға алынды

Петропавлда «Халық кеңесінің» үш мүшесі екі айға қамауға алынды. Бұл туралы Солтүстік Қазақстан облысы прокуратурасы хабарлады.

20 сәуір күні Петропавл қаласының мамандандырылған тергеу соты үш қатысушыға қатысты екі ай мерзімге қамауда ұстау түріндегі бұлтартпау шарасына санкция берді.

Айта кетейік, 19 наурыз күні Петропавлдағы колледждердің бірінде бір топ адам жиын өткізіп, «халық кеңесін» құрғанын мәлімдеді. Жиналғандар ұйым құрып, өздерін елден егемен ұйым ретінде жариялайтынын айтқан еді.

Қазір күдіктілерге қатысты сепаратизм бабы бойынша қозғалған қылмыстық іс тергеліп жатыр. Құзырлы орган өкілдерінің айтуынша, ұйымның қалған мүшелері қатаң бақылауда.