Петропавлда жетім бала «өлілер» қатарына кіріп кеткендіктен, баспанасыз қалды

Петропавлда жетімдер үйінің бұрынғы тәрбиеленушісі өзінің тұрғын үй кезегін күтіп шаршады. Себебі, оны белгісіз біреулер «өлілер тізіміне» қосып, жігітті кезектен шеттетіп тастаған.

Бұл туралы Orda.kz хабарлады.

25 жастағы петропавлдық Александр Рябуха бірнеше жыл бойы тұрғын үй кезегінде тұрған. Жақында ол өзінің тізімде жоқ екенін білді.

- Наурыз айында қарағанымда мен әкімдіктің баспана бойынша кезегінде болдым. Бірақ маған мені кезектен алып тастағандығы жөнінде sms-хабарлама келді. Тізім жарты жылда бір рет жаңартылады. Сол себепті күттім. Жақында ол жаңартылыпты, менің тізімде жоқ екенімді досым көріп, айтты. Иә, шынында да, жоқ екенмін. Әкімдікке барып білдім. Бұл қателік дейді. Кезектен алып тастау себебі ретінде менің қайтыс болғаным көрсетіліпті. Өткен екі күн бойы өзімнің тірі екенімді дәлелдеп, мені қайта кезекке қосулары үшін құжаттар жинадым, – дейді жас жігіт.

Александрдың айтуынша, оған жүйеде ақаулық болған деп айтқан. Осылайша, оның мәртебесі көрінбей қалған.

– Ол өткен аптада қалалық әкімдікке келді, оған не істеу қажеттігі айтылды. Ертең көші-қон полициясына барып, мәртебесін жаңартамыз. Мәртебесі 5 күннің ішінде өзгеруі керек. Тек содан кейін ғана оны баспана бойынша кезекке бұрынғы орнына қайта қояды, - дейді Петропавл қаласы әкімдігінің ішкі саясат бөлімі басшысы Азат Ыбыраев.

Шенеуніктер мәселені бақылауда ұстап отырмыз деп сендірді.