Петропавлда зейнеткердің 100 млн теңгесін ұрлағандар ұсталды

2023 жылдың маусым айында Петропавл қаласында суға сүзгі орнатамыз деп, зейнеткердің ақшасын ұрлаған екі жігіт ұсталды, деп хабарлайды Orda.kz порталы Рolisia.kz-ке сілтеме жасап. 

Екі жігіт еш күдік тудырмастан уәде еткен жұмысын орындаған. Зейнеткер көрші бөлмеден ақша алып шыққан кезде, екі жігіттің бірі ақша тұратын орынды байқап қалған. Екеуінің бірі егде жастағы адамды сөзге айналдырса, екіншісі көрші бөлмедегі ақшаны үптеп,  үйден тайып тұрған.

Ал әйел ақшасының қолды болғанын бірнеше күннен кейін ғана білген. 

Петропавл полиция басқармасының аға криминалисі Ербол Мусин пәтерді мұқият тінтіп шығып, сүзгі құрылғысы қорабынан күдіктілердің қолдарының ізін тапқан.

Олар Қостанай облысының тумалары болып шықты және біреуінің Петропавлда тұратыны белгілі болды.

Күдіктілер ұсталып, ақшаның бір бөлігі иесіне қайтарылды.