Петропавлдағы жарылыс салдарынан 3 адам хәл үстінде

Ақпан айының 21-і күні сағат 15:59 минутта Петропавлдағы интернационал көшесі 21 үйдің бірінші қабатындағы жарылған газ баллонның салдарынан зардап шеккендердің үшеуі жансақтау бөлімінде жатыр, жағдайлары ауыр, деп хабарлайды ORDA.

Солтүстік Қазақстан облысы денсаулық сақтау басқармасы баспасөз қызметінің мәліметінше, жарылыстан 16 адам ауыр жарақат алып, ауруханаға жеткізілген. Зақымданғандардың бірі – 24 жастағы жігіт қалалық көпбейінді ауруханада қайтыс болса, бұл емдеу мекемесінде қазір 20 жастағы қыз жансақтау бөлімшесінде жатыр. Жағдайы нашар. Бес адам амбулаторлық емделуге үйлеріне жіберілді. Ем алып жатқан тағы алтауының жағдайы орташа.

«10 жасар бала облыстық балалар ауруханасына түсті. Оның да жағдайы орташа. 1997 жылы туған екі ер адам облыстық көпбейінді аурухананың жансақтау бөлімінде жатыр, жағдайлары ауыр. Жалпы зардап шеккендердің орташа жасы 20-25 аралығында. Ең ересегі – 43 жаста», - дейді СҚО денсаулық сақтау басқарамасының баспасөз хатшысы Гүлнәр Сайлауқызы.

Бір адамның денесі үйінді астынан табылып, екіншісі ауруханада көз жұмды.

Бұл оқиға бойынша қылмыстық іс қозғалып, СҚО прокуроры тергеу барысын өз бақылауына алды.