Петропавлда шенеунік қызметтік көлікті жеке мақсатта пайдаланған

Әдеп жөніндегі кеңес отырысында Петропавл қаласы әкімінің орынбасары Сәния Смайылованың қызметтік көлікті жеке мақсатта пайдалануы талқыланды.

Бұл туралы Orda.kz Петропавловск.news-ке сілтеме жасап хабарлады.

– Қызметтік тексеру барысында демалыс күні қызметтік автокөлікті жеке мақсатта пайдалану фактісі расталды, бұл туралы бейнебақылау камераларының жазбалары да бар. Мемлекеттік қызметшілер автокөлік құралдарын қоса алғанда, мемлекет меншігін тек қызметтік мақсатта пайдалануға міндетті, - деді Мемлекеттік қызмет саласындағы бақылау басқармасының бас маманы Ергелді Қайыргелді.

Әдеп отырысына Сәния Смайылованың өзі келмеген, орнына қала әкімі аппаратының басшысы Қалия Түренова келген.

Түренованың айтуынша, Смайылова демалыс күні сенбілікке жетекшілік ету үшін қызметтік көлікті пайдаланған.

Алайда Солтүстік Қазақстан мемлекеттік қызмет істері департаментінің басшысы Елена Степаненко «әкімнің орынбасары заң бұзушылықты мойындап, өз әрекетіне өкінді» дейді.

Кеңес кезінде Сания Смайыловаға сөгіс беру ұсынылды.