Петропавлда әлеуметтік бейімдеу орталығы 18 млн теңгеге макарон өнімдерін алмақ болған

Солтүстік Қазақстан облысы бойынша Сыбайлас жемқорлыққа қарсы іс-қимыл департаменті мемлекеттік сатып алу жүйесіне мониторинг жүргізді. Осылайша, 2022 жылдың бірінші тоқсанында сатып алу бағасының төмендеуінің жалпы сомасы 581,9 млн теңгені құрады.

Мониторинг барысында облыстың квазимемлекеттік секторының бірқатар мемлекеттік органдары мен ұйымдарында жоспарланған тауарларға, жұмыстар мен қызметтерге бағаны көтеру фактілері анықталды.

Облыстық фтизиопульмонология орталығының басшылығы басқарманың ұсыныс хатынан кейін жалпы құны 150 млн теңгеге 100 мың респираторды қайта қарап, сатып алудан бас тартып, 150 теңгеге 10 қаламсап алуды жоспарлаған. Айта кетсек, бір ЖҚҚ орташа бағасы 493 теңгені құрайды.

СҚО бойынша Сыбайлас жемқорлыққа қарсы қызмет басшысының бірінші орынбасары Нұрлан Жахин қате енгізілген деректердің жиі кездесетінін атап өтті.

Мысал ретінде «Петропавл қаласының әлеуметтік бейімдеу орталығы» КММ жоспары келтірілген. Мекеме бір келі макарон өнімін 17 776 750 теңгеге сатып алуды жоспарлаған. Сыбайлас жемқорлыққа қарсы қызметтің араласуының нәтижесінде келісі 250 теңгеден жалпы құны 23 250 теңгеге сатып алу туралы шешім қабылданды.

Сондай-ақ, Ақжар ауданы Айсарин ауылдық округі әкімінің аппаратында 48,1 млн теңге бюджет қаражатының тиімсіз жұмсалуының жолы кесілді. Мемлекеттік мекеме келесі жылыту маусымына тоннасына 933 812 теңгеден 52 тонна тас көмір сатып алуды жоспарлаған.

Жалпы, жыл басынан бері облыстық сыбайлас жемқорлыққа қарсы күрес департаментімен жоспарланған сатып алу бағасын асыра бағалаудың 32 фактісі анықталып, олар бойынша 24 мемлекеттік органмен бағаны төмендету шаралары қолға алынған.