Петропавлда кейбір үйлер жылусыз қалды

16 көпқабатты үй мен 40-тан астам жеке сектордың үйі жылусыз қалды. Коммуналдық қызметтер «жылу трассасындағы технологиялық бұзушылық» салдарын жоюға тырысуда.

ҚазАқпараттың хабарлауынша, «Петропавл жылу желілері» ЖШС ұжымы бүгін қарқынды жұмысқа кірісті.

«Мамандар дренаждық жүйенің төсемдерін ауыстырып жатыр. Жұмыстарды аяқтаудың болжамды уақыты 16.00 сағат. Жылу желілері мекемесінің ұжымы жылдам жұмыс істейді. Объектілерді қосуда қиындықтар болмайды»  деп хабарлаған баспасөз қызметі жағдайдың қалыпты және ерекше ештеңе болмағанына сендірді.

«Севказэнерго» АҚ баспасөз қызметінің хабарлауынша, № 15 жылу трассасында технологиялық бұзушылыққа байланысты үйлерде жылу шектелген. Салдарынан Жуков, Қизатов, Победа, Заречная көшелерінің бойындағы 16 көпқабатты үй және Жуков, Қизатов, 2-ші және 3-ші кірпіш, 1-ші Заречная көшелерінің бойындағы 42 жеке тұрғын үй жылусыз қалған.