Петропавлда екі қыз педофилдердің құрбаны болды

Петропавлда екі күнде педофилдер 9 және 13 жастағы екі балаға зорлық көрсетті. Әзірге бір ғана күдікті ұсталды.

Бұл туралы Orda.kz хабарлады.

– 3 тамызда облыс орталығының бұрын сотталған тұрғыны кәмелетке толмағандарға қатысты басқа да сексуалдық әрекеттерді жасады деген күдікпен ұсталды, - деді Солтүстік Қазақстан ІІД баспасөз қызметінің жетекшісі Жанар Байғазина.

Оның айтуынша, бұл факт ҚР Қылмыстық кодексінің 121-бабы бойынша сотқа дейінгі тергеудің бірыңғай реестріне енгізілген. Күдікті уақытша ұстау изоляторына қамалды.

– 4 тамызда тағы бір жас қызға жыныстық зорлық көрсету туралы хабарлама келді. Бұл факт ҚР Қылмыстық кодексінің 121-бабы бойынша тергеудің бірыңғай реестріне енгізілді. Күдікті іздеуде. Полицияның барлық жеке құрамы осы бойынша жұмыс жасауда, - деді Байғазина.

Қылмыстар Солтүстік Қазақстан облысы Полиция департаменті мен облыстық прокуратура басшылығының ерекше бақылауында.

– Біз ата -аналардан мұқият болуды және балаларын қараусыз қалдырмауды сұраймыз, - деді СҚО полиция департаментінің баспасөз қызметі.

Қылмыстың бірі Петропавл қаласының шетінде Мещанский орманында орналасқан туберкулезге қарсы диспансер ауданында жасалған.

Еске салсақ, ҚР Бас прокуратурасының сайтында жарияланған кәмелетке толмағандарға қатысты жыныстық қылмыс жасаған адамдардың картасына сәйкес, Солтүстік Қазақстан облысында бес педофил тіркелген. Олардың төртеуі Петропавл тұрғындары, үшеуі бостандықта жүр.