Петропавлда «баламды ұрлады» деген әйелдің шындығы ашылды

Петропавл тұрғыны қамқоршылық органдар үлкен ұлын ұрлап кеткенін айтып, дабыл қақты. Балалар омбудсмені Динара Зәкиева жағдайға қатысты пікір білдірді, деп хабарлайды Orda.kz. 

Динара Зәкиеваның мәліметінше, 23 қыркүйекте Петропавл тұрғынының төрт жасар ұлы ауруханаға «оң жақ білектің екі сүйегінің жабық сынуы, кеуде, арқа, жамбас және тізе буындарының, жыныс мүшесінің көгеруі» диагнозымен түскен. Анасының айтуынша, бала баспалдақтан құлаған. Алайда дәрігерлер бұл жарақаттардың тек құлау салдарынан болуы мүмкін еместігін айтып отыр екен. 

Әйелдің үлкен ұлы балаларды қолдау орталығына орналастырылған, ал анасы кенже ұлын ертіп, ауруханадан қашып кеткен. Алайда бірнеше күннен кейін олар табылып, бала қайтадан ауруханаға жатқызылған. Тергеу барысында анасы полиция департаментінің қаулысымен баланың мүддесін қорғаудан шеттетілген.