Петропавлда әжесі мен немересі газдан уланды

Петропавлда әжесі мен немересі үйді жылыту үшін бензин генераторын орнатып, салдарынан улы газдан уланып қалды, деп хабарлайды Orda.kz.

КТК арнасының мәліметінше, оқиға Заречный ықшамауданындағы саяжайда болған. Су тасқынынан кейін бұл маңда әлі электр жарығы жоқ. Үйде бензин генераторы қолданылған. Бөлме бірден жанудан шыққан зиянды өнімдерге толып, салдарынан әжесі мен немересі уланып қалған.

 14 жастағы қыз анасына қоңырау шалып, әжесі екеуі кенеттен ауырып қалғанын хабарлаған. 68 жастағы зейнеткер жансақтау бөліміне, ал қыз балалар ауруханасына жатқызылды. Дәрігерлер екі зардап шегушінің де жағдайын орташа ауыр деп бағалады.