Петропавл қаласының тұрғыны қытай дәрісін ішем деп есінен танып қалды

Петропавл қаласының тұрғыны белгісіз препаратты қабылдағаннан кейін анафилактикалық шок алған, деп хабарлайды Orda.kz  Петропавловск.news сайтына сілтеме жасап.

18 қыркүйекте Петропавлда есін жоғалтқан әйелге жедел жәрдем қажет болды. Жедел жәрдем станциясына қоңырау 12:53-те түскен. Жедел жәрдем бригадасы - фельдшерлер Александр Корольков пен Иван Комисарчук пен жүргізуші-фельдшер Ярослав Фарбитник жеті минуттан кейін келді.

Есін жоғалтқан 55 жастағы әйелдің қызы науқас жедел жәрдем келгенге дейін 10 минут бұрын ауруды басатын қытайлық белгісіз дәрі қабылдағанын түсіндірді. Жедел жәрдем келгенше әйел ес-түссіз жатқан. Жүрек соғысы бәсеңдеген, дәрігерлер қан қысымын анықтай алмаған.

Дәрігерлер ACLS халықаралық стандарттары бойынша дереу көмек көрсетті. Әйелдің жағдайы түзеліп, есін жиды. Қалалық ауруханаға жатқызу кезінде әйелдің қан қысымы өлшенген.

«Науқастарға шұғыл көмек көрсету кезінде жедел жәрдемді дер кезінде шақырып, біліктілік пен білімді үнемі жетілдіріп отыру оң нәтиже береді. Тағы бір айта кететін жайт, адамдар өзін-өзі емдеп, белгісіз препараттарды қабылдағанда өте үлкен қауіп туындайды», - деп атап өтті облыстық жедел жәрдем станциясы баспасөз қызметі.

Еске сала кетейік, биылғы жылдың сәуір айында Өскеменде сұлулық салонына барған әйел қайтыс болған еді. Белгілі болғандай, 61 жастағы әйел көзіне блефаропластикалық операция жасату үшін сұлулық салонына барған. Салон қызметкерінің медициналық немесе өзге де қызметпен айналысуға лицензиясы да, рұқсаты да болмаған. Біраз уақыттан кейін науқас ауырып, жедел түрде жансақтау бөліміне жатқызылып, сол жерде қайтыс болды. Болжам бойынша, әйелдің өліміне анафилактикалық шок себеп болған.