Перзентханада ұл боп туған нәресте қыз боп шықты

Нұр-Сұлтан қаласының №1 перзентханасында Молдабековтер әулетінің келіні Ұлдана өмірге ұл әкеліп, артынша оның қыз екенін анықтаған.

Бұл туралы Orda.kz хабарлады.

Дүние есігін жаңа ашқан сәбиді акушер компьютерде «ұл» деп тіркеп, ал хирург дәрігер Молдабековтерге хабарласып, осы ақпаратпен бөліскен.

Келіншектің жақындары «маңдайы торсықтай ұлға» Рамазан деп ат қоюды жоспарлаған. Алайда, Рамазан Айару болып шыққан.

31 арнаның айтуынша, кесарь жасатқан Ұлданаға дәрігерлер ұл тудың деген. Ол есін жиып, баласын қолына алған кезде баласы ұлы емес, қыз екенін байқаған. Кейін дәрігер келіп, басында қате кеткені туралы ескертіп, Ұлдана негізінде қыз босанғанын айтқан.

Жас ана мен оның туыстары бұған сенбей, ДНҚ сараптамасын жасатады. Сараптама қорытындысы бойынша бала осы әулеттікі. Бірақ олар тағы да сараптама жасатуды жоспарлап отыр. Егер нәтижесі дәл осындай болса, перзентхана қызметкерлерін жауапқа тартады.