Пермь университетінде атыс: күдіктінің аяғы кесілді

Дәрігерлер 20 қыркүйекте Пермь мемлекеттік ұлттық зерттеу университетінде атыс ашқан 18 жастағы Тимур Бекмансұровтың аяғын кесіп тастады.

Бұл туралы Orda.kz «РБК» сайтына сілтеме жасап хабарлайды.

Жас жігіттің сол аяғын тізеге дейін ампутациялады. Оның жағдайы өте ауыр деп бағаланады.

Тромбтар пайда болғандықтан аяқты кесуге тура келген.

Бекмансұров 20 қыркүйекте Пермь мемлекеттік университетінің аумағына кіріп, университеттің студенттері мен оқытушыларына оқ жаудырды. Нәтижесінде алты адам қаза тауып, тағы 28 адам жарақат алды.

Білім және ғылым министрлігінің басшысы Валерий Фальков зардап шеккен жеті адам емделуге Мәскеуге жіберілетінін айтты. Олар 21 қыркүйекте ел астанасына жеткізілді. РБК дереккөзінің хабарлауынша, олардың кем дегенде төртеуі хирургия орталығына жатқызылды.