Перизат Қайраттың соты жабық режимде өтіп жатыр

Қайырымдылық қорына жиналған қаражатты жымқырды деп айыпталған Перизат Қайрат пен оның анасы Ғайни Алашбаеваға қатысты сот отырысы жабық режимде өтіп жатыр, деп хабарлайды Orda.kz.

Астана сотының баспасөз қызметі сот отырысы банк құпиялары жайлы жасырын деректердің қаралуына байланысты жабық болатынын ескертті. 

Бұған дейін осы істі жүргізіп жатқан судья Сабыржан Кәрімов сот отырыстарының дүйсенбі және бейсенбі күндері өтетінін бекіткен болатын. Алайда өткен аптада сот отырыстары сәрсенбі, бейсенбі және жұма күні түске дейін де өтті.

Айта кетейік, Перизат Қайрат айыптау актісі жарияланғаннан кейін кінәсін мойындамайтынын мәлімдеді. Сонымен қатар ол сот отырысында Алматының бұрынғы әкімі Бауыржан Байбекті сотқа шақырып, одан жауап алуды талап етті.

Еске сала кетсек, 2023 жылы Перизат Қайрат ел назарын Газа секторында зардап шеккендерге «көмек көрсетуге» бұрды. Оның қорына жүздеген миллион теңгенің қалай аударылғаны және БАӘ-нің патша әулетінің мүшелерімен достық қарым-қатынасы туралы мәліметтер алдыңғы сот отырысында айтылды. Бұл туралы материалымыздан оқыңыз.

Сондай-ақ, Orda.kz редакциясы Перизат Қайраттың әлеуметтік желідегі жазбаларын зерттеп, оның кімдерден қаражат алғанын және ірі кәсіпкерлерге дәл осы қор арқылы қайырымдылық жасауға кімдер кеңес беруі мүмкін екенін анықтап көрді.