Перизат Қайратқа қатысты даудан кейін Тоқаев интернет-алаяқтық мәселесін шешуді тапсырды

Бурабай баурайында өткен Ұлттық құрылтай отырысында мемлекет басшысы Қасым-Жомарт Тоқаев интернет-алаяқтық мәселесін шешуді тапсырды, деп хабарлады Orda.kz.

Президент қайырымдылық атын жамылған алаяқтық әрекеттердің көбейгеніне назар аударды.

«Құрылтай мүшелері соңғы уақытта жиілеп кеткен алаяқтық оқиғаларына алаңдаушылық білдіруде. Кейбір адамдар қайырымдылыққа ақша жинап, оны өз қажетіне жұмсайды. Көптеген азаматтар интернет-алаяқтардың құрбанына айналуда», – деді Тоқаев.

Сонымен қатар, Мемлекет басшысы адамдардың сенімін пайдаланып, табыс тауып жүрген жалған психологтар мен коучтердің әрекетін сынады.

«Оларға сеніп, ақшасынан айырылғандар көп. Маған бұл туралы көптеген шағымдар келіп түсуде. Айгүл Орынбек бұл мәселені орынды көтеріп жүр. Уәкілетті органдар аталған мәселеге мән беруі тиіс», – деді президент.