Пенжімдегі мектеп оқушыларының төбелесі ұлтаралық қақтығыс нәтижесінде шықты – ІІМ

Алматы облысының Пенжім ауылында ұлтаралық кикілжің салдарынан жаппай төбелес болды. Бұл туралы Ішкі істер министрлігі әкімшілік полиция комитеті ювеналды полиция және әйелдерді зорлық-зомбылықтан қорғау басқармасының басшысы Әсет Оспанов кәмелетке толмағандардың істері және құқықтарын қорғау жөніндегі ведомствоаралық комиссияның кезектен тыс отырысында мәлімдеді.

Бұл туралы Orda.kz хабарлады.

– Мектеп оқушылары арасында ұлтаралық негізде қақтығыстар орын алуда. Мұндай фактілер қазан айында ғана Батыс Қазақстанда, ал жақында Алматы облысы, Пенжім ауылында тіркелді. 9-10 сынып оқушылары арасында ұлтқа бөлінген топтық төбелес орын алды. Әлеуметтік желілерде Пенжім ауылы қызу талқыланып, қоғамда қызу реакция тудырды. Уақтылы қабылданған шаралар жанжалды ауыздықтауға және ұлтаралық араздықтың алдын алуға мүмкіндік берді, - деді Әсет Оспанов.

Еске салсақ, 28 қазанда 9-10-сынып оқушылары арасындағы ауызша керіс Пенжім ауылындағы жаппай төбелеске ұласты. Салдарынан мектеп оқушыларының бірінің атасы және 16 жастағы жасөспірім жарақат алып, Панфилов ауданының орталық ауруханасына жатқызылды.

Бұған дейін Қазақстан халқы ассамблеясы тәртіпсіздіктер ұлтаралық қақтығыс негізінде болмағанын мәлімдеген болатын.

– Ауыл тұрғындары арасында ұлтаралық қақтығыстар былай тұрсын, ешбір қақтығыс болмағанын және ешқашан болмайтынын ерекше атап өткім келеді, - деді ҚХА баспасөз хатшысы Майя Бекбаева.