«Педофил — Алланың барына дәлел»: Имам дау болған сөзін түсіндірді

Нұр-Мүбарак ислам мәдениеті университетінде дәріс оқыған ұстаз Нұржан Смағұл әлеуметтік желіде қызу талқыланған «педофилдердің болуы — Алланың бар екеніне дәлел» деген сөзіне қатысты пікір білдірді, деп хабарлайды Orda.kz.

Ұстаз Нұржан Смағұлдың айтуынша, бұл «жоқ жерден шыққан дау» имамды әдейі қаралау мақсатында жасалған.

«Негізі, болмашы нәрседен туындаған дау. Соңғы уақытта интернетте белсенді болғандықтан, мені әдейі қаралау мақсатында таратылған жала деп есептеймін. Менің айтқан ойым – жақсылық пен жамандықтың табиғаты туралы. Бұл тақырып Шәкәрім Құдайбердіұлының еңбектерінде де, Абайдың қарасөздерінде де кездеседі», — деді ұстаз.

Оның айтуынша, дәрістің негізгі мақсаты – әлемдегі жақсылық пен жамандықтың да Алланың қалауымен болатынын түсіндіру болған.

«Соңғы кезде мұсылмандарға қарсы «егер Құдай бар болса, неге педофилдер бар?» деген сұрақтар жиі қойылып жүр. Мен осы сауалға теологиялық тұрғыда жауап беруге тырыстым. Яғни, дүниеде не болса да, оның бір жаратушысы бар, біз қаламасақ та, барлығы Оның қалауымен жүзеге асады деген ойды айтқым келген», — деді ұстаз.

Имам өз сөзінің бұрмаланып, контекстен үзіп алынғанын тағы да атап өтті.

«Исламофобтық, атеистік және радикалды топтарға бұл жағдай жақсы құралға айналып отыр. Олар бізге қарсы әрекет етіп, өз ықпалын күшейту мақсатында осындай амалдарға барып отыр», — деп түсіндірді ол.

Еске салайық, бұған дейін әлеуметтік желіде Нұржан Смағұлдың дәрісінен үзінді жарияланып, онда ұстаз «педофилдердің болуы — Алланың бар екеніне дәлел» деген сөзі қоғамда наразылық тудырған болатын.