Павлодарлықтар АҚШ Бас консулдығы грантына ие болды

Алынған ақшаға ірімшік жасап, сөмке тігіп, құс өсіріп, ішкі үйлесімділік студиясын ашуды жоспарлап отыр.

Павлодар облысынан «Әйелдер кәсіпкерлігі академиясы» бағдарламасына 30 талапкер өтініш білдірген. Нәтижесінде бес кәсіпкер әйел долларлық грантқа ие болды, деп хабарлайды Pavlodarnews.kz.

Ондағы жобалардың ішінде: ірімшік, май және сүзбе шығаратын цех, қолдан жасалған сөмкелер шығару, құс шаруашылығы, балық жартылай фабрикаттарын өндіру және ішкі үйлесімділік студиясын ашу бар. Грант қоры – 14 мың доллар немесе 6,7 млн ​​теңге.

АҚШ Бас консулдығының қоғаммен байланыс жөніндегі кеңесшісінің орынбасары Чад Киннир: «Әйелдер көшбасшы болатын елдердің экономикасы тез дамып келеді деп сенеміз» деді.

Дипломат министрліктің басым бағыттарының бірі Қазақстан экономикасын қолдау мен екіжақты қарым-қатынасты дамытудан бөлек, әйелдердің бизнестегі көшбасшылығын қолдау екенін еске салды.

«Атамекен» ҰКП Кәсіпкерлер құқығын қорғау және әкімшілік кедергілерді азайту бөлімінің басшысы Мүбарак Жақыпов павлодарлықтар құқықтық қолдауда немесе әкімшілік кедергілерге тап болған жағдайда Кәсіпкерлер палатасынан көмек сұрай алатынын қосты.

Сондай-ақ, ол кәсіпкерлікті дамытудың ұлттық жобасы бойынша мақұлданған 1100 жобаның 322-сі 3,8 млрд теңге несие қоржыны бар әйелдердің үлесіне тиетінін атап өтті.

Естеріңізге сала кетейік, «Әйелдер кәсіпкерлігі академиясы» бағдарламасы 2019 жылдан бері жұмыс істейді. Оған Қазақстаннан басқа тағы 80 мемлекет қатысуда.