Павлодарлықтар келер жылы әуежайсыз қалуы мүмкін

Павлодар облысының әкімі Асайын Байханов әуежайдың қазіргі жағдайы туралы айтты, деп хабарлайды Orda.kz. 

Аймақ басшысының айтуынша, әуежайдағы ұшу-қону жолағын қайта құру әлі аяқталмаған. Құрылыс ұзаққа созылған конкурс пен мердігер таңдау салдарынан кешіккен. Қазір павлодарлықтар аптасына үш рет Астанаға, күніне екі рет — Алматыға ұшады.

Қайта құру жобасына сәйкес, әуежай ғимараты кеңейтіледі және жаңартылады. Жоба сараптамасы 2025 жылдың наурыз айында аяқталады.

Байханов Павлодар әуежайы заманауи талаптарға сай болуы керегін және өңірдің транзиттік әлеуетін арттыру үшін жаңартуларды талап ететінін атап өтті. Әкім әуежай келесі жылдың жазында жөндеуге қайта жабылатынын мәлімдеді.