Павлодарлық әкімдер жол сапасына басымен жауап береді

Жақында Павлодардағы республикалық және жергілікті маңызы бар жолдарға тексеру жүргізіледі. Болжам бойынша, ол жол-көлік оқиғаларын алдын алып, өңірдегі жолдарда жарақаттану мен өлім-жітім деңгейін төмендетеді.

Бұл туралы Orda.kz Pavlodarnews.kz-ке сілтеме жасап хабарлады.

– Павлодар облысының автомобиль жолдарының жалпы ұзындығы 5441,1 шқ құрайды, ағымдағы жылдың басынан бері жалпы пайдаланымдағы автожолдарға 890 тексеру жүргіздік. Тексеру барысында 2027 ақау анықталды. Зерттеу нәтижелері бойынша анықталған кемшіліктерді жоюға 895 ұйғарым берілді. 140 лауазымды және заңды тұлға әкімшілік жауапкершілікке тартылды, оның ішінде 21-і ауыл және ауылдық округ әкімдері жазаланды, - деді Павлодар облысы полиция департаменті әкімшілік полиция басқармасының бастығы Нұржан Таңатаров.

ҚР Әкімшілік құқық бұзушылық туралы кодекстің 630, 631 және 632-баптары бойынша 18 әкім, 420-бабы бойынша 3 әкім жауапқа тартылды.

Сонымен қатар, тексеріс кезінде 92 теміржол өткелінің жағдайы қаралды. Қажетті жол белгілерінің болмауы, дұрыс жарықтандырмау және төсемнің қанағаттанарлықсыз жағдайы сияқты кемшіліктер анықталды. Нәтижесінде 19 шенеунік әкімшілік жауапқа тартылды.