Павлодардағы өліммен аяқталған төбелес: сот үкімді қайта қарап, айыпталушыны босатты

Павлодарда апелляциялық сот 21 жастағы Жоламан Құсайыновтың ісін қайта қарады. Оны бұған дейін өлімге әкелген төбелес үшін 4,5 жылға бас бостандығынан айырған болатын, деп хабарлайды Orda.kz.

NewTimes.kz мәліметінше, бүгін сот залынан бостандыққа шыққан Жоламан Құсайыновты алғашында бірінші сот орташа қауіпсіздік деңгейіндегі колонияда 4,5 жылға бас бостандығынан айырған. Алайда, екі тарап та апелляциялық шағым түсірді. Қорғаушы үкімді жоюды талап етсе, прокуратура жазаны қатаңдатуды сұрады. Прокурор 4,5 жыл тым жеңіл жаза екенін айтып, оны 8 жылға дейін ұлғайтуды талап еткен болатын.

«Іс қылмыстық кодекстің 106-бабы 3-бөлігінен,112-бабы 2-бөлігіне қайта қаралады. Жаза 1 жылға дейін төмендетілді. Жоламанның тергеу изоляторында өткізген алты айы 1 күн – 2 күн есебімен есептеліп, ол сот залынынан бостандыққа шықты», – деп түсіндірді Құсайыновтың қорғаушысы Ерлан Ғазымжанов.

Оқиға 2024 жылдың жазында Павлодардағы «Гоголь» барының жанында жанжал шығып, қайғылы жағдайға ұласқан. 23 жастағы Сергей Сухоносенко сол күні 21 жастағы Жоламан Құсайыновқа бірінші болып келіп тиісіп, пышақпен қоқан-лоққы көрсеткені сол жердегі барлық бейне бақылау камераларына түскен. Ал Құсайынов Сухоносенкодан қорғану мақсатында оны итеріп жібереді. Салдарынан ол жерге құлап,  миына қан құйылып сол жерде көз жұмады. 

Сонымен қатар, Сол күні Сергей Сухоносенко қанынан алкоголь табылған болса, Құсайынов мас болмағаны дәлелденген.