Павлодарда жасөспірімді зорлады деп сотталған блогерді өлтіргендер жазаға тартылды

Екібастұздық сотталған блогерді өлтірді деп айыпталған Павлодар облысындағы қатаң режимдегі колонияның үш тұтқыны 17, 14 және 12 жылға сотталды. Павлодардың №2 сотының үкімі 12 мамырда шыққан, бірақ бұл туралы енді белгілі болды.

«А., Ж., және К., қылмыстық-атқару жүйесі мекемесінде бас бостандығынан айыру жазасын өтеу кезінде 2021 жылғы 8 және 9 мамырда алдын ала келісіп, аса қатыгездікпен қару ретінде илектеу түріндегі ағаш заттарды пайдаланып, сотталушы К.Ю.-ны соққыға жығып, денсаулығына ауыр зиян келтірген. 2021 жылдың 9 мамырында сотталушы қайтыс болған» делінген pvl.sud.kz сайтындағы ақпаратта.

Павлодардағы қатаң режимдегі колонияда қаза тапқан - екібастұздық 40 жастағы блогер Юрий Комм. Ол 14 жасар қызды саяжайда зорлағаны үшін 15 жылға бас бостандығынан айрылған болатын. Дегенмен ол өз кінәсін мойындамады. Оның әпкесі де ағасының қылмыс жасамағанын, қыздың пәк болып қалғанын алға тартты. Ал, басқа ақпарат құралдары мен құқық қорғаушылар сот үкімінен кейін қалада кәмелетке толмаған қызды қудалау басталғанын жазды.

Еске салсақ, 2021 жылдың 8 мамыры күні кешкісін АП-162/4 мекемесінің жуынатын бөлмесінде адам өлтіргені үшін жазасын өтеп жатқан 44 жастағы сотталушы тағы бір тұтқынды ұрып-соғып, ол 2021 жылдың 9 мамырында қайтыс болды.

2021 жылдың қаңтар айының соңында блогер «Зорлау» бабы бойынша сотталған. Сот анықтағандай, қылмыс 2020 жылдың 7 маусымына қараған түні болған. «Горняк» саяжайында мас ер адам 14 жастағы қызды қорлаған.