Павлодарда ұйқы безі ісігіне жасалған күрделі ота сәтті өтті

Мұндай операция аурудан толық айығуға 20–30% жағдайда мүмкіндік береді, , деп хабарлайды Orda.kz.      

Павлодарда ұйқы безі ісігіне қатысты күрделі ота сәтті өткізілді, деп мәлімдеді ҚР Денсаулық сақтау министрлігінің баспасөз қызметі.

«Павлодар қалалық №1 ауруханасында ұйқы безінің қатерлі ісігін емдеуге бағытталған абдоминалдық хирургиядағы ең күрделі операциялардың бірі — панкреатодуоденалдық резекция бойынша шеберлік сабағы өтті. Операция шамамен бес сағатқа созылды. Күрделі отаны медицина ғылымдарының докторы, Ресей медицина ғылымдары академиясының академигі, ҚР Ұлттық ғылым академиясының корреспондент-мүшесі, профессор Болатбек Баймаханов жүргізді. Мұндай операция 20–30% жағдайда науқастың толық сауығуына, ал қалған жағдайларда өмір сапасы мен ұзақтығын едәуір жақсартуға мүмкіндік береді» деп жазылған хабарламада. 

Былтырғы жылдан бастап аурухана базасында жаңа орталық жұмыс істейді. Мұнда осындай операцияларды тұрақты түрде жүргізу, өңірлік тәжірибені дамыту және облыс тұрғындарына жоғары технологиялық медициналық көмектің қолжетімділігін арттыру жоспарланып отыр.

Осындай операцияларды аурухана базасында жасауға А корпусының қайта жаңғыруы мен заманауи жабдықтармен қамтамасыз етілгені мүмкіндік берді. Бұған дейін мұндай диагнозы бар науқастар онкологиялық орталықтарға немесе елорда клиникаларына жіберілетін.

Шеберлік сабағының қорытындысы бойынша Сызғанов атындағы Ұлттық ғылыми хирургия орталығы, Павлодар облысының денсаулық сақтау басқармасы және қалалық №1 аурухана арасында бірлесіп жұмыс істеу туралы меморандумға қол қойылды.

Құжат тәжірибе алмасу, жаңа технология енгізу, білім беру және ғылыми-практикалық жобаларға қатысуды, сондай-ақ медицина қызметкерлерінің біліктілігін арттырады деп күтілуде.