Павлодарда салынып жатқан құны оншақты миллиард болатын көпірде өрт шықты

Павлодар қаласында сенбі күні кешке, 31 қаңтарда, Ертіс өзені арқылы өтетін салынып жатқан автомобиль көпірінде өрт шықты, деп хабарлайды Orda.kz.

Оқиға орнынан түсірілген бейнежазбаларды әлеуметтік желілерде куәгерлер жариялады. Кадрлардан көпірдің тұрғызылған құрылымының бір бөлігін от шарпығаны көрінеді. Оқиға орнында жедел қызметтер жұмыс істеп жатыр.

«ҚазАвтоЖол» компаниясының Павлодар облыстық филиалының хабарлауынша, өрт сағат 20:10-да Қызылорда — Павлодар — Успенка — Ресей Федерациясы шекарасы бағытындағы автожол учаскесіндегі тіректердің бірінде болған.

«№4 тіректегі жылу жамылғысынан өрт шықты. Өртті төтенше жағдайлар қызметкерлері сағат 20:50-де жедел түрде сөндірді. Өрт аумағы 60 шаршы метр болды», — деп түсіндірді компания өкілдері.

Алдын ала мәлімет бойынша, өрттің шығуына сол сәтте салынып жатқан көпірдің тірегінде жүргізілген арматуралық қаңқаны дәнекерлеу және монтаждау жұмыстары себеп болған.

Төтенше жағдайлар министрлігінің мәліметінше, өрт сөндірушілер оттың таралуына жол бермеген.

«Өрт ошағы жерден шамамен 30 метр биіктікте орналасқан. Күрделі жағдайларға қарамастан, өрт сөндірушілердің жедел әрі үйлесімді әрекетінің арқасында жалын қысқа мерзімде бақылауға алынып, толықтай сөндірілді», — деп атап өтті ведомство. 

Зардап шеккендер жоқ, өрттің нақты себебі анықталып жатыр.

Павлодар қаласында жаңа автомобиль көпірінің құрылысы 2024 жылдың мамыр айында басталған. Бұл нысан жасы 60 жылдан асқан қолданыстағы Ертіс өзені арқылы өтетін өткелдің орнына салынуда. Жобаның құны ондаған миллиард теңгеге бағаланып отыр.

«ҚазАвтоЖолдың» мәліметінше, бұл көпір еліміздегі алғашқы экстрадозды көпір болады және әр бағытта екі жолақтан, барлығы төрт жолақты, бірінші санаттағы автомобиль жолдарының талаптарына сай келеді. Нысанды биылғы жылдың соңында пайдалануға беру жоспарланған.

Бұған дейін құрылыс басталғалы бері ешқандай техникалық ақау немесе қадағалау органдары тарапынан ескерту тіркелмегені хабарланған еді.

Оқи отырыңыз:

• Атырауда «жасыл белдеуді» құрылыс салу үшін берген ауыл әкімі қызметінен кетті
• Рыбакина әлемнің бірінші ракеткасын жеңіп, Australian Open-2026 жүлдесін иеленді
• Конституцияның жаңа жобасында экс-президенттердің өміріне қолсұғылмаушылық сақталған