Павлодарда өрт қауіпсіздігіне байланысты 42 әкімшілік іс қозғалды

Павлодар мектептерінде өрт қауіпсіздігі сақталмайтындығы себепті 245 лауазымды адам жауапкершілікке тартылып отыр.

Ертіс өңірінің төтенше жағдайлар қызметі 268 білім беру нысанын тексеріп, көптеген ақаулықтар тапты. Өрт қауіпсіздігі ережесіне қатысты екі мыңға жуық дерек тіркелді.

Дабыл қағатын құралдар істемейді. Электр сымдарында ақаулық бар. Ал өрт болған жағдайда шығатын терезелерде темір тор ілінген.

–  250 нысанға  бақылау, тексеру жүргізілді. Оның 205 объектісінде бұзушылықтар толық жойылды. Ал 45 мекемеде бұзушылықтар жойылмаған. Оған байланысты әкімшілік іс қозғалып,. сот органдарына жолданды. Қазіргі таңда жалпы сомасы 11 млн. 84 мың теңге болатын 42 әкімшілік іс қозғалды. Үш іс қаралуда, - дейді облыстық ТЖД өрт бақылау басқармасы бастығының міндетін атқарушы Оразбек Уәлиханов.

245 лауазымды тұлға жауапкершілікке тартылып, оларға тез арада олқылықты жою міндеттелді. 25 іс бойынша жауаптыларға 800 мың теңге айыппұл салынған.