Павлодарда қарттарды миллиондарға алдағандар  ұсталды

Павлодарлық жедел уәкілдер зейнеткерлерді алдады деген күдікті топты ұстады.

Соңғы екі аптада Павлодар полициясына алаяқтық фактілері бойынша 30-ға жуық облыс тұрғыны арызданған, олардың барлығы егде жастағылар. Адамдар қалай алданғанын айтып берді, алаяқтар оларды туыстарының қиыншылыққа тап болғанын, апатқа ұшырағанын және шұғыл түрде көп ақша қажет екеніне сендірген.

«Егде жастағы азаматтар барлық жинақталған ақшасын жинап, келген курьерге беріп жіберіп отырған. Нәтижесінде алаяқтық жасады деген күдікпен қылмыстық топ құрықталды. Олар 19 бен 21 жас аралығындағы Павлодар қаласының төрт тұрғыны болып шықты. Қазіргі уақытта олардың алты алаяқтыққа қатысы бар екені анықталып, алдау арқылы зейнеткерлердің 25 миллион теңгесін иемденіп алғаны анықталды. Ұсталғандардан 3 миллион 900 мың теңге тәркіленіп, екі жәбірленушіге қайтарылды», - дейді Павлодар облысы Қылмыстық іздестіру басқармасының бастығы Балғабай Қапаров.

Аталған факті бойынша  Қазақстан Республикасының Қылмыстық кодексi 190 бабының 3-бөлігі бойынша сотқа дейінгі тергеу басталды. Олардың екеуіне қатысты қамауға алу түріндегі бұлтартпау шарасы таңдалды. Тағы екеуі үйқамақта. Полицейлер топтың осыған ұқсас алаяқтыққа қатысы бар-жоғын тексеріп жатыр. Ұйымдастырушының жеке басы анықталуда.