Павлодарда кішкентай баладан «нигериялық» штамм табылды

Павлодар облысында бес жасар баладан коронавирустың Қазақстанда жақында табылған нигериялық Eta штамы табылды.

Бұл туралы Orda.kz Pavlodarnews.kz сайтына сілтеме жасап хабарлады.

Мұндай ақпаратпен онлайн баспасөз жиынында облыстық денсаулық сақтау басқармасының басшысы Айдар Сейітқазинов бөлісті.

– Павлодарда бір отбасындағы баладан сараптама алынды. 2016 жылы туған баладан коронавирустың нигериялық Eta штамы анықталды. Ол отбасының барлық мүшесі бұл штаммен ауырып, жазылып шыққан, - деді Айдар Сейітқазинов.

Белгілі болғандай, бұл жағдай тамызда тіркелген. Қазір баланың жағдайы жақсы.

– Ол кезде Алматыға 5 сараптама жіберілді. Оның біреуінен нигериялық штамм, үшеуінін Дельта штамы анықталды, - деді облыстық денсаулық сақтау басқармасының басшысы.

Еске салсақ,  21 қыркүйекте денсаулық сақтау министрі Алексей Цой Қазақстан аумағынан нигериялық Eta штамы табылғанын айтқан.