Павлодарда қауіпті медициналық қалдықтар тастаған компанияға айыппұл салынып, жұмысы тоқтатылды

Пайдаланылған инелер мен қолғаптар бос жатқан аумаққа рұқсатсыз тасталған, деп хабарлайды Orda.kz.

Тексеру нәтижесінде қалдықтардың шынымен де қаланың өнеркәсіптік аймақтарының біріндегі ашық алаңда орналастырылғаны анықталды. Кейін олар сол маңда тұрған контейнерге көшірілген.

«Аталған учаскені басқарған компания  «BB-Group KZ»  ЖШС-нің медициналық қалдықтарды кәдеге жарату бойынша жоба құжаттамасына экологиялық сараптаманың оң қорытындысы болмаған», - деп мәлімдеді экологтар. 

Тексеру қорытындысы бойынша компанияға 200 айлық есептік көрсеткіш (АЕК) мөлшерінде, яғни 786 400 теңге көлемінде айыппұл салынды. Сондай-ақ, экология департаменті компанияның барлық қажетті рұқсаттарды алғанға дейін қызметін тоқтату туралы талап арыз берді.

Бұған дейін павлодарлықтар қауіпті медициналық қалдықтар тасталған орын тапқаны туралы хабарланған еді. Оқиға орнынан түсірілген видео әлеуметтік желілерде резонанс тудырды. Кейін полиция мен СЭС бұл учаскенің биологиялық тұрғыдан қауіпті материалдарды заңсыз сақтауға пайдаланылғанын растады.

Еске салсақ, Мемлекет басшысы медициналық қоғамдастықтың және белсенді азаматтардың медицина қызметкерлеріне шабуыл жасағаны және қатыгездік көрсеткені үшін жауапкершілікті қатаңдату ұсынысын қолдаған еді.