Павлодарда әйел нәрестені суық мезгілде тастап кетті

Павлодар облысында кішкентай баласын қауіп-қатерге қарамастан суыққа тастап кеткен 33 жастағы ана ұсталды, - деп хабарлайды polisia.kz

Естеріңізге сала кетейік, 26 қараша күні сағат 20:40-та полицияға Павлодардағы «Автовокзал» трамвай аялдамасының орнынан 8-9 айлық бала табылды деген хабарлама келіп түскен. Тексеру кезінде баладан көзге көрінетін жарақаттар табылған жоқ. Дереу барлық аумақтық және шекаралық аймақтарға кәмелетке толмаған баланың табылғандығы жарияланған. Барлық жақын көшелер пысықталып, куәгерлермен сұхбат жүргізілді.

Нәтижесінде учаскелік инспекторлар жедел түрде 32 жастағы Toyota Camry автокөлігінің иесі павлодарлықтық жігітпен байланыс орнатты. Оның айтуынша, «InDriver» мобильді қосымшасы арқылы клиенттерді тасымалдау кезінде Семейден Павлодар қаласына балалы әйелді алып келген. Бірақ, артынша баланы автобус бекетінде қараусыз қалдырғаны анықталып отыр.

«Екі сағаттан астам уақыт өткен соң күдікті әйел ұсталды. Баланы қауіп-қатерге қалдыру фактісі бойынша Қазақстан Республикасы Қылмыстық Кодексінің 119-бабы бойынша сотқа дейінгі тергеу басталды», - деді брифингте Павлодар облысы полиция департаментінің бастығы Нұрлан Мәсімов.

Тастанды баланы жедел-жәрдем дәрігерлері қарағаннан кейін Павлодардағы ауруханаға жатқызды.