Әскерге шақырылған екі жігіт үшінші қабаттан секіріп, қашып кетті

ҚР Қорғаныс министрлігі жиналу пункті орналасқан Павлодар облысы әкімдігінің ғимаратынан екі павлодарлық шақырылушының қашып кетуі түсірілген видеоға түсініктеме берді.

Бұл туралы Orda.kz хабарлады.

Қорғаныс министрлігі бұл ақпаратты растады. Оқиға 2 мамырда орын алған. Әскерге шақырылушылардың бірі үшін қашу сәтсіз аяқталды.

– Мерзімді әскери қызметшілер 1998 жылы туылған Құлниязов Мұхамедкәрім Қайратұлы және 2001 жылы туған Рүстем Русланұлы Назымбеков әскери қызметке шақырылды. 2021 жылы 2 мамырда Павлодар облысы әкімдігінің аймақтық жиналу пунктінің ғимаратында болып, олар үшінші қабаттан секіріп, қашып кетті. Құлниязов жарақат алып, қазір «жабық сыну» диагнозымен қалалық ауруханада жатыр, - деп хабарлады ҚР Қорғаныс министрлігінің баспасөз қызметі.

Қашып кеткен екінші жігітті қазір облыстық полиция іздеуде. Оның қай жерде екендігі әлі анықталмады.

Қорғаныс істері жөніндегі департамент қашқындардың әскерге шақырудан босатудың заңды негіздері болмағанын атап өтті.

 – Аталған факті бойынша Қылмыстық кодекстің 387-бабы «Бұл қызметтен босатудың заңды негіздері болмаған кезде әскерге шақырудан жалтару» бойынша қылмыстық іс қозғалды, - деді Қорғаныс министрлігі.

Баптың санкциясына сәйкес, жастарға мың айлық есептік көрсеткішке дейінгі айыппұл - 2 917 000 теңге немесе төрт жүз сағатқа дейінгі мерзімге қоғамдық жұмыстарға тартылу немесе бір жылға дейінгі бостандықты шектеу жазасы қолданылады.