Павлодарда Даңқ ескерткішінде билеген жасөспірімдер жазаланды

Павлодарда Даңқ ескерткішінің жанында арандатушылық ниетпен әдейі  билеген жасөспірімдер әкімшілік жауапкершілікке тартылды, деп хабарлайды Orda.kz.

«Кәмелетке толмағандар құқыққа қарсы әрекеттері үшін әкімшілік жауапкершілікке тартылды. Бұдан басқа, балаларды тәрбиелеу жөніндегі міндеттерді тиісінше орындамағаны үшін олардың заңды өкілдері де әкімшілік жауапкершілікке тартылды. Материалдар процессуалдық шешім қабылдау үшін сотқа жіберілді», деп хабарлады бейсенбі күні Павлодар облысы полиция департаментінің баспасөз қызметі.

Әлеуметтік желілерде төрт жасөспірімнің Жеңіс алаңында мәңгілік алау жанында жұлқынып билеп жүрген видеосы тарады. Бейнежазбадағы қатысушылардың бірінің «Жеңіс саябағын қорлаймыз» деген сөзі жұрттың ашуына тиіп, жасөспірімдердің бұл ісіне құқық қорғау органдарының араласуына тура келді.

Бейнеге үш оқушы мен қаладағы колледж студенті түскені белгілі болды. Олардың барлығы би студиясында жаттығады. Екеуі 16 жаста. Олар өздері оқитын мекемелерде арнайы есепке қойылды.