Павлодарда балаларға қол көтерген тәрбиешіге қылмыстық іс қозғалды

Павлодар қаласындағы №116 балабақшада тәрбиешінің бүлдіршіндерге қол көтеріп, шаштарынан тартқаны бейнебақылау камерасына түсіп қалған, деп хабарлайды Orda.kz.

Кадрларда тәрбиешінің бірнеше баланы шапалақтап, қолынан тартып, дөрекі әрекетке барғаны анық көрінеді. Ата-аналар оқиғаны әлеуметтік желіге жариялап, тиісті органдарға дереу шара қолдануды талап еткен.

Адам құқықтары жөніндегі өңірлік уәкіл Сәуле Шәкенованың айтуынша, бүгін мектепке дейінгі мекемеге полиция қызметкерлері, Бала құқықтары жөніндегі өңірлік уәкілдер және ата-аналар келіп, бейнежазбаны қарап шыққан.

«Кәмелетке толмаған баланы тәрбиелеу жөніндегі міндеттерді орындамау дерегі бойынша қылмыстық іс қозғалды. Қазір оқиғаның себептері мен мән-жайы анықталып жатыр. Балабақша басшылығының әрекетіне де құқықтық баға беріледі»,  деп хабарлады Павлодар облыстық полиция департаменті.

Қоғамда үлкен резонанс тудырған бұл жағдай әлеуметтік желі қолданушыларының ашуын туғызды. Көпшілік мектепке дейінгі мекемелерде тәрбиешілердің психологиялық жағдайы мен бейінді тексерулерді күшейтуді талап етіп отыр.

Еске сала кетейік, Астанадағы Millennium Park тұрғын үй кешенінде ер адам бұрынғы сүйіктісін пышақтап өлтірді.