Павлодарда бүлдіршін тайып құлап, омыртқасын сындырып алды

Павлодарда көшедегі көктайғақтан жарақат алғандардың саны артты, деп хабарлады ORDA Sputnik Қазақстан сайтына сілтеме жасап.

Бұл өсім 10 наурыздан бастап байқалды, сол күні 80-ге жуық адам жедел жәрдемге жүгінді. Көмек көрсетілгеннен кейін олардың 20-сы травматология және политравма бөлімдеріне жатқызылды. Оларға ота жасалады. Қалғаны амбулаторлық емделуге жіберілді. Бұл туралы №1 Павлодар қалалық ауруханасының травматолог-дәрігері Жанболат Ғазизов хабарлады.

Павлодар облысы денсаулық сақтау басқармасының баспасөз хатшысы Эльмира Темірғалиева зардап шеккендердің арасында бес бала бар екенін айтты. Олардың төртеуі медициналық көмек алғаннан кейін амбулаторлық емделуге жіберілді, ал бір бала тайып құлап, омыртқасын сындырып алған. Ол облыстық балалар ауруханасының травматология бөліміне түсті.