Павлодарда алтыншы сынып оқушылары пышақтасты

Мектеп жасындағы бала өзі құралыптас екі мектеп оқушысына пышақ сұғып алды. Қазіргі уақытта балалардың өміріне қауіп жоқ, полиция оқиға бойынша қылмыстық іс қозғады, деп хабарлайды Orda.kz.

Павлодар облысы бойынша облыстық бала құқықтары жөніндегі уәкіл Сәуле Шәкеневаның айтуынша, Павлодарда 11 қыркүйек күні түстен кейін «Эрзи» дүкенінің жанында алтыншы сынып оқушылары арасындағы жанжал пышақтасуға ұласқан.

«6-сынып оқушыларының бірі екі оқушыға пышақ жарақатын салған. Ешкімге айтпай, балалар үйлеріне қайтып кеткен. Сол күні кешкісін мектеп оқушылары облыстық балалар ауруханасына медициналық көмекке жүгініп, жарақаттары тігілді. 12 қыркүйекте жәбірленушілердің ата-аналары мектеп әкімшілігіне хабарлаған, олар кәмелетке толмағандар арасындағы зорлық-зомбылық, әлімжеттік (бұзақылық), кибербуллинг жағдайларына жедел әрекет етуді сұрап, білім бөліміне хабар беріп, полиция шақырған», -деп түсіндірді Сәуле Шәкенева.

Уәкілдің айтуынша, жұма күні, 13 қыркүйекте Павлодар қаласы әкімінің орынбасары Светлана Гладышеваның төрағалығымен кәмелетке толмағандардың істері және олардың құқықтарын қорғау жөніндегі комиссияның кезектен тыс отырысы өткен.

Аталған оқиға бойынша жағдайға жауапты кәмелетке толмағандардың заңды өкіліне қатысты да, мектеп әкімшілігіне қатысты да шешімдер мен ұсыныстар қабылданды.

«Бұл факті бойынша қылмыстық іс қозғалды», - деп түсіндірді Шәкенева.

Оның айтуынша, қазір зардап шеккен оқушылардың денсаулығына қауіп төніп тұрған жоқ, олар сабаққа қатысуда.

«Қамзин көшесіндегі үйдің ауласында екі оқушының денсаулығына қасақана жеңіл зиян келтіру фактісі бойынша қылмыстық іс қозғалды. Жанжал кезінде мектеп оқушысы басқа балаларға дене жарақатын салған», - деп хабарлады Павлодар облыстық полициясының баспасөз қызметі. 

Полиция бұған дейін қылмыстық іс қозғамай-ақ тергеу жүргізгенін айтқан болатын.