Павлодарда 8 миллион теңгеге сатылған өндірістік нысан мемлекетке қайтарылады

Павлодарда 8,3 миллион теңгеге сатылған өндірістік нысан мемлекетке қайтарылады.

Бұл туралы Павлодар облыстық прокуратурасы хабарлады.

Әңгіме облыс орталығындағы Шығыс өнеркәсіп аймағында орналасқан екі қабатты мүлік кешені жайлы болып отыр. Кешенге мұнай өнімдерін сақтау үшін бес резервуар және жарты гектар жер учаскесі кіреді.

Сарапшылар қорытындысына қарасақ, кешеннің құны сатылған сомадан ондаған есе жоғары. Нысан облыстық мемлекеттік мүлік және жекешелендіру департаменті арқылы аукционда сатылған.

«Прокурордың талабы бойынша сот сауда-саттықты және кейінгі сатып алу-сату шарттарын жарамсыз деп таныды. Қазіргі уақытта меншік иесінің құқықтарын жою шаралары қабылданып жатыр»,  деді Павлодар облыстық прокуратурасы.