Павлодар облысындағы орман өрті Ресейге өтуі мүмкін

Бүгін түсте «Ертіс орманы» орман шаруашылығында  өрт шықты, деп хабарлайды Orda.kz. тілшісі.

Павлодар облысы Төтенше жағдайлар департаменті мен орман шаруашылығы кәсіпорны қызметкерлері Шарбақты ауданындағы өртті сөндіруге түскі сағат үштер шамасында кірісті.

«Өрттің Ресей Федерациясының Алтай аймағына өту қаупі бар. Өрт орнында 24 техника мен 104 адам жұмыс істеп жатыр»  деп хабарлады облыстық ТЖД.

Өрттің ұлғаюына байланысты Сүгір ауылының 26 ​​тұрғынын эвакуациялау жоспарланған, бұл мақсатқа арнайы техникалар жіберілгенімен, желдің бағыты өзгеріп, ауылға қауіп төнген.

Павлодар облысының әкімдігі өңірде найзағайдың көп түсуіне байланысты Шарбақты ауданы мен Аққұла өңіріндегі  орман шаруашылығында бірден бірнеше өрт шыққанын хабарлады. Жағдайды ыстық, құрғақ ауа райы және қатты жел қиындата түскен.

«Жағдайды бақылау және бағалау үшін облыс әкімі Асайын Байханов пен Төтенше жағдайлар департаментінің басшылығы оқиға орнына ұшып кетті. Өртті оқшаулау және өрттің одан әрі таралуына жол бермеу бойынша қажетті шаралар қабылданатын болады» деп хабарлады облыс әкімдігі.

Бұған дейін «Ертіс орманы» қорығында күндізгі найзағай салдарынан 17 өрт шыққаны хабарланған болатын. Қазір Абай облысында орман тағы өртеніп жатыр.