Павлодар облысында жалған іссапар рәсімдеген шенеунік жауапқа тартылды

Павлодар облысында жалған іссапар рәсімдеп, ақшасын қолды еткен шенеуніктер жауапқа тартылды. Істі Павлодар қаласының №2 соты қарады.

Бұл туралы Orda.kz Pavlodarnews.kz-ке сілтеме жасап хабарлады.

Облыстық соттың баспасөз қызметінің мәліметінше, облыстық сәулет басқармасы мемлекеттік қызметкерлерінің кінәсі куәгерлердің айғақтарымен, тиісті құжаттармен және сот сараптамаларының қорытындыларымен дәлелденген.

Сеніп тапсырылған мемлекеттік мүлікті бірнеше рет ірі мөлшерде ысырап еткені үшін Қылмыстық кодекстің 189-бабы бойынша басқарма басшысы, әкімшілік бөлімінің басшысы, бас маман, бөлім басшысының міндетін атқарушы сотталды.

Сонымен қатар, тағы бір павлодарлық Қылмыстық кодекстің 364-бабы бойынша кәсіпкерлік қызметке заңсыз қатысқаны үшін сотталды.

– 2018 жылдың шілдесінде үш мемлекеттік қызметші 1,6 млн теңге көлемінде кең форматты сканер сатып алуға бөлінген мемлекеттік бюджеттен ақша   жымқырған, - деп хабарлады облыстық сотта.

Олар 2019 жылдың қаңтарынан 2020 жылдың желтоқсанына дейінгі кезеңде  жалған іссапарлар ресімдеп, 8,9 млн теңге жұмсаған.

ҚР мемлекеттік қызметші анты бұзылғанын ескере отырып, сот ведомство басшысына 3 жыл мерзімге, ал оның қарамағындағы үш адамға 2 жыл 6 айдан әрқайсысына бас бостандығынан айыруды тағайындады. Сотталғандар өмір бойы мемлекеттік қызметте қызмет атқару құқығынан айрылды.

Әкімшілік бөлім басшысының кішкентай баласы болғандықтан, мерзімді өтеу уақыты бес жылға шегерілді.

Үкім заңды күшіне енген жоқ.