Павлодар облысында шетелден тауарға тапсырыс беруді үйреткен шенеунік жұмыстан қуылды

Павлодар облысында шетелден тауарға тапсырыс беруді үйреткен мемлекеттік қызметкер жұмыстан қуылды, деп хабарлайды Orda.kz ҚР Мемлекеттік қызмет істері агенттігінің Павлодар облысы бойынша департаментіне сілтеме жасап.

«2024 жылдың соңына қарай жүргізілген тексеру шаралары нәтижесінде 35 мемлекеттік қызметші тәртіптік жауапкершілікке тартылды. Қазақстан Республикасы ауыл шаруашылығы Министрлігінің ветеринарлық бақылау және қадағалау комитетінің Май аудандық аумақтық инспекциясының бас маманының жоспардан тыс тексеру барысында Қазақстан Республикасының заңнамасында белгіленген шектеулерді сақтамау фактісі анықталды»,  деп хабарлады  ҚР Мемлекеттік қызмет істері агенттігінің Павлодар облысы бойынша департаменті. 

Мемлекеттік қызметшінің оқытушылық, ғылыми және өзге де шығармашылық қызметтен басқа ақы төленетін қызметпен айналысуға құқығы жоқ. Дегенмен, инспекцияның бас маманы шын мәнінде әлеуметтік желілерде интернет-сайттарда басқа елдерден тауарды өз бетінше іздеу және сатып алу туралы хабарландырулар орналастырғаны белгілі болған.

Ол қызметінен босатылды.