Павлодар облысында өгей әке қызын зорлады деген күдікке ілінді

Жасөспірім қыз ауруханаға жөнелтілді, ал ер адам қамауға алынды, деп хабарлайды Orda.kz тілшісі. 

Павлодар облысы Майқайың ауылының тұрғыны 15 жастағы өгей қызын зорлады деген күдікке ілінді.

«Зорлау дерегі бойынша қылмыстық іс қозғалды. Күдікті ұсталып, уақытша ұстау изоляторына қамалды», деп түсіндірді Павлодар облысының полиция департаменті. 

Павлодар облысы бойынша Бала құқықтары жөніндегі уәкіл Сәуле Шәкенева сотқа дейінгі тергеу жүріп жатқанын растады.

Ол сондай-ақ, өзінің талабы бойынша жасөспірімді ауруханаға жіберіп, онымен психологтар жұмыс істейтінін айтты.

«Мүмкін зорлық-зомбылық бірнеше рет болған шығар, әрине, балаға көмек пен тексеру қажет. Дәл осы кезеңде мектеп мұғалімі қыздың күйзелісіне назар аударғанын айта аламын. Нәтижесінде бала өз мәселесін ашық айтып берген», – дейді Сәуле Шәкенева. 

Облыстық бала құқықтары жөніндегі уәкіл істі бақылауды жалғастырып, жәбірленушіге қажетті қолдау көрсететінін айтты.