Павлодар облысында ірі дала өрті 44 гектарға жайылды

Павлодар облысындағы батпақты далада қатты қураған ағаштар мен құрғақ шөп өрті 44 гектар аумаққа жайылды, деп хабарлайды Orda.kz.

«24 наурыз күні сағат 13:31-де Қ.Қамзин ауылдық округіне қарасты Қарабай ауылы аумағында қураған ағаштардың жанып жатқаны туралы хабарлама келіп түсті. Оқиға орнына облыстық Төтенше жағдайлар департаментінің күштері мен құралдары, Ақсу қаласы Қ.Қамзин ауылдық округі әкімдігінің өрт сөндіру бекеті, Павлодар орман шаруашылығының орман күзетшілері, ерікті өрт сөндіру жасақтары жіберілді», деп хабарлады Павлодар облысы Төтенше жағдайлар департаментінің баспасөз қызметі.

Төтенше жағдайлар департаментінің мәліметінше, жекелеген өрт ошқтарына қол жетімсіздік пен 15 м/с-қа дейін жететін екпінді жел сияқты ауа райы жағдайлары салдарынан өрт сөндіру жұмыстары қиындай түскен.

Алайда батпақты аумақтағы құрғақ шөп пен қамыстың өртенуі сағат 22:57-де 44 га аумақта сөндірілді.

Өртті сөндіруге 28 адам мен жеті техника қатыстырылды.