Павел Дуров Астанаға не үшін келеді?

Астанада 2 қазан күні Қасым-Жомарт Тоқаевтың қатысуымен өтетін Digital Bridge 2025 форумына Павел Дуров келеді, деп хабарлайды Orda.kz. 

Президенттің қатысумен өтетін бұл халықаралық форумның негізгі мақсаты alem.ai жасанды интеллект орталығының ашылуы. Сонымен қатар, форумда Telegram мессенджерінің негізін қалаушы Павел Дуров сөз сөйлейді.

Дуровтың форумға келетіні жайлы Қазақстанның БАӘ-дегі төтенше және өкілетті елшісі Рауан Жұмабек әлеуметтік желідегі парақшасында жазды.

«Telegram негізін қалаушымен кездесіп, форумға қарсаңында пікір алмасқаныма қуаныштымын. Оның идеялары инновациялар мен цифрлық трансформация жөніндегі жаһандық диалогқа құнды үлес қосатыны анық», – деді Жұмабек.

Еске сала кетейік, Павел Дуров Астанаға 2024 жылдың 27 маусымында  келген еді. Ол сапарында Дуров цифрлық даму министрлігінің басшысы Жасұлан Мәдиевпен кездесті.