«Пәтер құны 40 мың»: Елес кезген ауыл жойылуға жақын

11 қараша 2024 12:19 Альфия Адамбек

Фото: Видеодан алынған кадр

Кеңес Одағы кезінде Мәскеудің қолдауымен өркендеген ауыл тәуелсіздіктен кейін өркениеттен жұрдай болды, деп хабарлайды Orda.kz.

AIRAN YouTube арнасында Жамбыл облысы Мойынқұм ауданындағы Мирный ауылының үйіндіге айналуға аз қалғаны көрсетілді. Кеңес Одағы кезінде уран өндірілген ауылда бүгінде адам қарасы аз. 30 жыл бұрын ауылда аурухана, мәдениет үйі, бассейн, кинотеатрға дейін болған. Сапалы үйлер салынып, басқа өңірден келген халық екі қолға бір күрек тауып жүрген. Ол кезде ауылда 10 мыңға жуық адам болыпты. Мәскеу ауылды қамтамасыз еткен. Бірақ Кеңес Одағы тарағаннан кейін ауылдың шырқы бұзылған. Жұмыс тоқтаған. Ақшасыз халық басы ауған жаққа үдере көшкен. Бүгінде ауылда 600-ге жуық адам тұрады. Тіпті бір кіреберісті бір-бір отбасы иемденіп отыр.

«2 пәтер сатып алғанмын. Бірін 40 мыңға, екіншісін 50 мыңға сатып алдым. Мен көшіп келгенде енді бұзылып жатқан ауыл еді. Содан әлі бұзылып жатыр ғой. Таразға көшеміз. Бұл үйді тастап кетеміз. Алатын ешкім жоқ. Бұл жерде ешкім тұрмайды», - дейді ауыл тұрғыны.

Ауылда пәтер жалдап тұратын бірен-саран адамдар да бар екен. Олар пәтер ақысына айына 5 мың теңге беретіндерін айтты.

«Бұл үйде әйелім екеуіміз ғана тұрамыз. Пеш жағамыз. Су сатып аламыз. Біз қайда көшеміз? Баратын жеріміз жоқ. Зейнеткерміз. Бұрын ауылымыз керемет еді. Мәскеу қамтамасыз ететін. Кейін Кеңес Одағы тарағасын біз ешкімге керек болмай қалдық. Ең бірінші су құбырларын бұзып әкетті. Содан кейін шетінен бұзып, талқандап әкете берді. Ауруханаға бүкіл аудан келіп қаралатын. Не керектің бәрі болды. Қазір солардың тек қирандылары қалды», - дейді ауыл тұрғыны.

Тұрғындар ауылдың болашағы жоқ деп отыр. Реті келсе бәрі көшіп кетуге дайын. Шалғайдағы ауылға мемлекет те, әкімдік те қараспайтынына халық қатты наразы.

Жаңалықтар

барлық жаңалықтар