Пашинян отставкаға кетіп, қайта сайлауға түсетінін айтты

Армения премьер-министрі Никол Пашинян отставкаға кетті, бірақ үкімет басшысы міндетін  кезектен тыс парламент сайлауы өткенше атқаратын болады.

Сайлауға Пашинянның өзі де қатысады. Ол сайлауға  «Азаматтық келісім» партиясының атынан түседі.

— Бүгін мен кезектен тыс парламент сайлауын өткізу үшін отставкаға кетемін. Премьер-министрі міндетін сайлау өткенше атқарамын,- деді ол 25 сәуірдегі теле үндеуінде.

Армения конституциясы бойынша  парламентті тарату үшін премьер-министр отставкаға кетуі керек.  Үкімет басшысы отставкаға кеткен жағдайда, парламент фракциялары жеті күн ішінде премьер қызметіне үміткер ұсынады. Ол үшін ұлттық жиналыс өтіп, үміткерге депутаттардың  көбі дауыс беруі керек.

Пашинян Армения премьер-министрі қызметіне тағы да үміткер екенін айтты.

— Мені Армения премьер-министрі қызметіне «Азаматтық келісім» партиясы ұсынады, - деді ол.

Ел оппозициясы  Пашинянды біржола кетіруге тырысуда. Оның қарсыластары Пашинян толық отставкаға кетпей сайлау әділ өтпейтіндігін айтады. Ал Пашинян болса сайлауда жеңілсе, билікті жеңген адамға тапсыратынын хабарлап үлгерді.

Армениядағы наразылық Таулы Қарабақ жөніндегі келісімнен кейін өршіп кетті. Әзірбайжан, Ресей және Армения арасындағы келісімге сәйкес, Таулы Қарабақтың бір бөлігі мен оның айналасындағы аумақ Әзірбайжан бақылауына өтті. Пашинянның өзі  қақтығысты тек осы жолмен ғана тоқтату мүмкін болғанын айтты.