Париж орталығында Макронға қарсы шеру өтті

Парижде қазіргі мемлекет басшысы, Франция президенттігіне үміткер Эммануэль Макронға қарсы шеру өтті, деп хабарлайды РИА Новости.

Сәуірдің 16-сы күні түстен кейін Франция астанасының 8-ші округіндегі Фонтенуа  алаңында басталған шеру Патриоттар қозғалысының жетекшісі Флориан Филиппоның шақыруымен ұйымдастырылды.

Шерушілер Макронның Франция басшысы болып қайта сайлануына наразылық білдіруде. Митингте Макронның саясатына наразы жүздеген адам қатысты.

— Біз қарсылыққа шықтық, өйткені француздардың көпшілігі бірінші турда Эммануэль Макронға дауыс бермеді! Біз оның келесі бесжылдық жоспарына «жоқ»  деп айтуға шықтық! Ол Елисей сарайынан кетуі керек, - деді акцияны ұйымдастырушылардың бірі.

Шеру бейбіт түрде өтті. Наразылық білдірушілер: «Макрон - енді ешқашан болмайды!» деп ұрандатты.

Бұған дейін Францияда президенттік сайлаудың бірінші кезеңі өткен болатын. Қазіргі президент Эммануэль Макрон 28 пайызға жуық дауыс жинап, бірінші орынды иеленді.

Екінші орында Марин Ле Пен 24,58 пайыз дауыспен тұр. Францияда президенттік сайлаудың екінші кезеңі 24 сәуірде өтеді.