Парамен ұсталған Жоғарғы сот судьясы қызметінен босатылды

Жоғарғы соттың судьясы Мейрам Жанғуттинов айыптау үкімінің заңды күшіне енуіне байланысты қызметінен босатылды.

«Біздің қарауымызға мемлекет басшысының Мейрам Жанғуттиновты Жоғарғы сот судьясы қызметінен босату туралы ұсынысы енгізілді. Жанғуттинов сот шешімімен қызметтік жағдайын пайдаланып, алаяқтық жасады деп танылды. Бұл үкім заңды күшіне енді» деп айтты Жоғары сот кеңесінің төрағасы Денис Шипп парламент сенаты отырысында.

Сенат депутаттары оның отставкаға жіберілуіне дауыс берді.

Еске сала кетейік, 63 жастағы Мейрам Жанғуттинов 2021 жылғы 11 ақпанда пара алу кезінде ұсталған болатын. Тергеу мәліметінше, Жанғуттинов Түркістан облысының аудандық судьясы Лиза Тұрғынбаевадан басқа жұмыс орнына ауысқаны үшін ақша алған.