Паралимпиада жүлдегерлері мен олардың жаттықтырушылары марапатталды

Тоқаев Паралимпиада жүлдегерлері мен олардың жаттықтырушыларын медальдармен марапаттау туралы жарлыққа қол қойды, деп хабарлайды Orda.kz Ақордаға сілтеме жасап.

Парижде өтіп жатқан XVII Жазғы Паралимпиада ойындарында жоғары спорттық жетістіктері үшін бірқатар спортшылар мен олардың жаттықтырушылары мемлекеттік наградалармен марапатталды.

Қазақстан президенті Қасым-Жомарт Тоқаев сенбі, 14 қыркүйекте тиісті жарлыққа қол қойды.

Екі дүркін Паралимпиада чемпионы Давид Дегтяров 1-дәрежелі «Барыс» орденімен марапатталды.

Париж төрінде тұғырдың ең биік сатысына көтерілген Ақмарал Науатбек ІІІ дәрежелі «Барыс» орденімен марапатталды.

Күміс медаль алған Еркін Ғаббасов, Нұрдәулет Жұмағали және Ерғали Шәмей «Парасат» орденінің иегері атанды.

«Құрмет» орденімен Паралимпиада ойындарының қола жүлдегерлері Дастан Мұқашбеков, Зарина Райфова, Даяна Федосова және Жұрқамырза Шұқырбеков марапатталды.

Ұлттық құраманың бас бапкерлері мен спортшылардың жеке бапкерлері де жоғары дәрежеде марапатталды.

Бес тәлімгер «Парасат» орденімен, қалған жетеуі «Құрмет» орденімен марапатталды. Тағы екі жаттықтырушы Қазақстан Республикасы Президентінің Құрмет грамотасына ие болды.